Май 6 Тыва Республиканың Конституциязының хүнү

Тыва Республиканың Конституциязының (Үндезин хоойлузунуң) төөгүзү солун болгаш күрүне тургузуунга хамаарышкан чугула документилерни ажылдап кылырынга кончуг улуг салдарлыг. Бот-догуннаан күрүне Тыва Арат Республиканың тургустунганын 1921 ч. август 15-те чарлаан бүгү чоннуң шуулганынга эң-не баштайгы тыва Конституцияны хүлээп алган. ТР-ниң амгы Конституциязы Тываның төөгүзүнде сески конституция болуп турар.

2001 ч. май 6-да хулээп алган Конституция республикага болуп турган ниитилел-политиктиг нарын болуушкуннарның шылгалдаларын эрткен. Тыва Республиканың Конституциязы чангыс катап бижээн тапталчак чүүл эвес, а ниитилелде болуушкуннар-биле кады сайзырап чоруур күрүне документизи дээрзин үе көргүскен. Ооң үндезининге 2003 ч. июнь 24-те, 2005 ч. декабрь 28-те, 2010 ч. апрель 11-де өскерилгелерни ТР-ниң Дээди Хуралы (парламентизи) аңаа кииргени бадыткап турар.
Тыва Республиканың Конституциязынга хамаарыштыр ниитилел-политиктиг үзел-бодалдар янзы-бүрү болза-даа, Россия Федерациязының Конституциязынга бүрүнү-биле ол дүгжүп, республикада чогумчалыг байдалдың болгаш ооң бурунгаар хөгжүлдезиниң бүзүрелдиг магадылалы дээрзин амыдырал көргүскен.

2022 ч. май 5-те Тыва Республиканың Конституциязынга уткуштур Тураннын 2 дугаар ортумак школазының 7 «Б», 11 класстарнын өөреникчилеринге класс шактары эрттиртинген.
#ДеньКонституцииТыва